ناوه‌ڕۆك
ناساندن
کۆلێژی زمان بریتییە لە خوێندن و فێربوونی زمانە جیهانییە جیاوازەکان، بە شێوەیەکی زانستی و ئەکادیمی، هەروەها خوێندکار ئاشنا دەکرێت بە کولتوور و ئەدەب و مێژووی پەیوەست بەو زمانە، خوێندکارانی هەردوو بەشی وێژەیی و زانستی وەردەگرێت، بەڵام ئەم کۆلێژە پێگەیەکی تایبەتی هەیە بۆ بەشی وێژەیی و ساڵانە هەوڵی زۆری بۆ دەدەن.
بەشە سەرەکییەکانی کۆلێژی زمان
- وەرگێڕان
- زمانی ئینگلیزی
- زمانی کوردی
- زمانی عەرەبی
- زمانی تورکی
- زمانی فارسی
- زمانی فەڕەنسی
- زمانی ئەڵمانی
جیاوازی کۆلێژی زمان و ئاداب لەگەڵ کۆلێژی پەروەردە
کۆلێژی پەروەردە بە گشتی گرنگی بە شێوازی وانە وتنەوە دەدات، وانە و پسپۆڕییە سەرەکییەکانی پەیوەستە بە بابەتەکانی مامۆستایی و وانەبێژییەوە، بەڵام لە کۆلێژی زمان و ئاداب زیاتر تیشك دەخرێتە سەر وانەکانی تایبەت بە سیستەمەکانی زمان و دەنگسازی و ڕستەسازی و وشەسازی و زمانەوانی و تیۆرەکانی زمان، هەرەوەها بە شێوەیەکی سەرەکی گرنگی دەدرێت بە ئەدەب و مێژووی گەلان و بنەما سەرەکییەکانی ئەدەب و ڕەوانبێژی، دەرچووی زمان پسپۆڕییەکەی زیاتر توێژەر و لێکۆڵینەوەیە، بوارەکانی کارکردنی فراوانترە.
قۆناغەکانی خوێندن
ماوەی خوێندن لەم بەشە بۆ ماوەی چوار ساڵە، خوێندکار لە دوای تەواوکردنی ماوەی خوێندن دەبێتە خاوەنی بڕوانامەی بەکالۆریۆس، پاشان دەتوانێت خوێندنی پلەی باڵا (ماجستێر و دکتۆرا) بەدەستبهێنێت، کە دواتر وەکوو ئەکادیمی دادەمەزرێن لە کۆلێژ و زانکۆکان.
مەرج و تایبەتمەندی خوێندکارانی ئەم بەشە
- بوونی ئاستێکی باش لە زمانی ئینگلیزی چونکە بنەمایەکی سەرەکی بەشەکانی زمانە.
- بوونی حەز و خولیا بۆ فێربوونی زمانی نوێ و کولتوورە جیاوازەکان.
- بوونی یادگەیەکی بەهێز و توانای تێگەیشتن و لەبەرکردنی باشبێت، هەروەها توانای شیکارکردنی هەبێت.
- خاوەن کەسایەتییەکی بەهێز و بوونی باوەڕ بەخۆبوون، هەروەها دەبێت کەسێکی کۆمەڵایەتی و کراوە بێت چونکە پێویستە خوێندکاری ئەم بەشە توانای گفتوگۆکردنی هەبیت لەگەڵ کەسانی خاوەن زمانەکانی تر و لە کاتی قسەکردندا لە هەڵە کردن نەترسێت.
- پشوودرێژی و ئارامی، چونکە بە ئاسانی فێری زمان نابیت، پێویستە هەوڵ بدەیت و بەردەوامبیت لە فێربوون و خوێندنەوە و بەدوادا چوون.
- توانایی و کارامەیی لە دەربڕین و هەبوونی دەستی نوسین کە یارمەتیدەرن بۆ فێربوونی زمان.
بوارەکانی کارکردن
بواری کارکردن هەمەچەشنە، دەرچووی ئەم کۆلێژە دەتوانێت بە لێهاتوویی و کارامەیی خۆی لە چەندان بواردا کاربکات، ئەمانە چەند نموونەیەکی بوارەکانی کارکردنن:
- کارکردن وەکوو وەرگێڕ لە دامودەزگا حکوومەییەکان.
- کارکردن لە بواری ڕاگەیاندن لە ڕادیۆ و تەلەفزیۆندا، وەکوو ئامادەکار و پێشکەشکار و بێژەری هەواڵ و هەروەها دەتوانێت لە بواری زمانەوانی و هەڵەچنی دەستبەکار بێت.
- دەرچووی بەشەکانی زمان دەتوانێت لە کەرتی تایبەت وەکوو وەرگێڕ لە کۆمپانیاکان دەستبەکار بێت.
- دەتوانێت لە بواری گەشت و گوزار و ڕێبەری گەشتیاران دەستبەکار بێت.
- کەرتی پەروەردە، دەرچووی ئەم بەشە دەتوانرێت وەکوو مامۆستای زمانەکان لە خوێندنگەکان وانە بڵێتەوە.
- دەتوانێت وەکوو نوسەر و ڕۆژنامەنووس دەستبەکار بێت.
